واشنگٹن: مشرق وسطیٰ میں کشیدگی اور تیل کی ترسیل پر بڑھتے خدشات کے دوران امریکی صدر ڈونلڈ ٹرمپ نے آبنائے ہرمز سے گزرنے والی بحری تجارت کے لئے اضافی تحفظ کے اقدامات کی ہدایت کی ہے۔ رائٹرز کے مطابق صدر ٹرمپ نے کہا کہ ضرورت پڑنے پر امریکی بحریہ کمرشل جہازوں اور آئل ٹینکروں کے ساتھ حفاظتی نگرانی اور ایسکارٹ ڈیوٹی بھی انجام دے سکتی ہے۔
رپورٹ کے مطابق امریکی انتظامیہ نے خلیج میں جہاز رانی کے لئے مالی تحفظ بڑھانے پر بھی کام شروع کیا ہے۔ صدر ٹرمپ نے امریکی انٹرنیشنل ڈیولپمنٹ فنانس کارپوریشن کو سیاسی خطرات سے متعلق انشورنس اور مالی گارنٹی جیسے انتظامات پر ہدایات دیں، مقصد یہ ہے کہ جنگی خطرات کے باوجود شپنگ کمپنیوں اور تجارتی راستوں پر دباؤ کم ہو اور توانائی کی سپلائی جاری رہے۔
ایک اور رپورٹ میں بتایا گیا کہ خطے میں حالات کے باعث تیل کی قیمتوں میں اضافہ دیکھا گیا اور آبنائے ہرمز سے متعلق خدشات نے مارکیٹ میں بے یقینی بڑھائی۔ اسی پس منظر میں امریکی اقدامات کو توانائی کی ترسیل اور عالمی مارکیٹ میں سپلائی برقرار رکھنے کی کوشش کے طور پر دیکھا جا رہا ہے۔
