وفاقی وزیر بحری امور جنید انوار چوہدری نے اعلان کیا ہے کہ پاکستان کی سی فوڈ برآمدات نے پہلی بار 50 کروڑ ڈالر کی تاریخی حد عبور کر لی ہے، جو ملکی فشریز سیکٹر کے لیے ایک بڑی کامیابی قرار دی جا رہی ہے۔
وزیر بحری امور کے مطابق حکومت نے مالی سال کے لیے مقرر کردہ 50 کروڑ ڈالر کا ہدف مقررہ مدت سے 46 روز قبل ہی حاصل کر لیا، جو برآمدی شعبے میں نمایاں پیش رفت کی عکاسی کرتا ہے۔
انہوں نے بتایا کہ موجودہ رفتار کو دیکھتے ہوئے رواں مالی سال کے اختتام تک پاکستان کی مجموعی فشریز برآمدات 80 کروڑ ڈالر تک پہنچنے کی توقع ہے۔
بیان کے مطابق چین بدستور پاکستان کی سی فوڈ مصنوعات کی سب سے بڑی بین الاقوامی منڈی ہے، جبکہ جولائی سے دسمبر کے دوران فشریز برآمدات میں 21.6 فیصد اضافہ ریکارڈ کیا گیا۔
وزیر نے مزید کہا کہ منجمد مچھلی پاکستان کی سب سے بڑی برآمدی کیٹیگری بن چکی ہے، جبکہ تھائی لینڈ، جاپان اور یورپی یونین کو بھی برآمدات میں خاطر خواہ اضافہ دیکھا گیا ہے۔
حکام کے مطابق وسطی ایشیائی ممالک میں بھی پاکستانی سی فوڈ کی طلب میں مسلسل اضافہ ہو رہا ہے، جو اس شعبے کے لیے نئی تجارتی راہیں کھول رہا ہے۔
