ڈیاگو گارسیا کہاں ہے اور کیوں اہم ہے

ڈیاگو گارسیا چاگوس جزائر کا حصہ ہے، یہ بحر ہند میں واقع جزائر کا مجموعہ ہے جو ماریشس سے شمال مشرق کی سمت سمندر میں دور واقع ہے۔ برطانیہ نے 1814 کے بعد ماریشس کے ساتھ یہ جزائر بھی اپنے کنٹرول میں رکھے۔ ماریشس کو 1968 میں آزادی ملی، مگر چاگوس کا انتظام برطانیہ کے پاس رہا۔

امریکا اور برطانیہ نے سرد جنگ کے دور میں 1970 کی دہائی کے آغاز میں ڈیاگو گارسیا پر بڑا فوجی اڈہ قائم کیا، جسے بعد میں مختلف علاقائی آپریشنز میں استعمال کیا گیا۔

چاگوس ڈیل کیا ہے

برطانیہ اور ماریشس کے درمیان ہونے والے معاہدے کے تحت چاگوس جزائر کی خودمختاری ماریشس کو منتقل ہونے کی بات سامنے آئی، جبکہ ڈیاگو گارسیا کے فوجی اڈے کے لئے برطانیہ 99 سالہ لیز کے تحت استعمال جاری رکھے گا۔ اس انتظام میں سالانہ ادائیگی 101 ملین پاؤنڈ بتائی گئی، جو ڈالر میں قریب 136 ملین بنتی ہے، اور مجموعی مالیت کئی دہائیوں میں تقریباً 3.4 ارب پاؤنڈ کے برابر بتائی گئی۔