بلومبرگ نے رپورٹ کیا ہے کہ ایران کے خلاف جنگ شروع ہونے کے بعد امریکا کے کم از کم 16 فوجی طیارے اور ڈرونز ضائع ہو چکے ہیں۔ رپورٹ کے مطابق اس فہرست میں ایم کیو نائن ریپر اسٹرائیک ڈرونز کی تعداد سب سے زیادہ بتائی گئی ہے، جبکہ چند بڑے نقصانات حادثات اور حملوں کے نتیجے میں سامنے آئے۔
بلومبرگ کے مطابق مجموعی نقصان میں 10 ریپر ڈرونز شامل ہیں۔ رپورٹ میں کہا گیا ہے کہ ان میں کم از کم 9 ڈرون ایرانی فضائی دفاع کی کارروائی میں فضا میں تباہ ہوئے، جبکہ ایک ڈرون اردن کے ایک اڈے پر بیلسٹک میزائل لگنے سے متاثر ہوا۔
رپورٹ میں بتایا گیا کہ تین امریکی ایف 15 لڑاکا طیارے کویت میں “فرینڈلی فائر” کی زد میں آئے۔ اس واقعے پر امریکی سینٹکام نے اپنے بیان میں کہا تھا کہ تمام 6 ایئرکرو نے ایجیکٹ کیا، انہیں بحفاظت نکال لیا گیا، اور وہ مستحکم حالت میں ہیں۔
ایک اور بڑے واقعے کے بارے میں بلومبرگ کے مطابق کے سی 135 ری فیولنگ طیارہ مغربی عراق میں ری فیولنگ آپریشن کے دوران تباہ ہوا، اور سینٹکام کے مطابق اس حادثے میں موجود تمام 6 اہلکار ہلاک ہوئے۔
بلومبرگ رپورٹ میں یہ بھی کہا گیا ہے کہ اس کے علاوہ کچھ طیارے حملوں یا حادثات میں بری طرح متاثر ہوئے۔ مثال کے طور پر رپورٹ میں سعودی عرب کے ایک اڈے پر کھڑے کئی کے سی 135 طیاروں کو میزائل حملے سے نقصان پہنچنے کا ذکر آیا۔
