امریکی صدر ڈونلڈ ٹرمپ نے کہا ہے کہ “بورڈ آف پیس” کو اقوام متحدہ کے متبادل کے طور پر بنانے کا مقصد نہیں۔ وائٹ ہاؤس میں گفتگو کے دوران صدر ٹرمپ نے کہا کہ اقوام متحدہ کو اپنا کام جاری رکھنا چاہیے۔ انہوں نے یہ بھی کہا کہ وہ اقوام متحدہ کی صلاحیت کے حامی ہیں، مگر ادارہ اپنی پوری کارکردگی دکھانے میں کامیاب نہیں رہا۔
اسی گفتگو میں صدر ٹرمپ نے بتایا کہ برطانیہ اور فرانس کی قیادت کے ساتھ تعلقات اچھے ہیں اور رابطہ موجود ہے۔ انہوں نے یہ بھی کہا کہ وہ پیرس میں ہونے والے جی سیون اجلاس میں شرکت نہیں کریں گے۔
وینزویلا سے متعلق سوال پر صدر ٹرمپ نے کہا کہ وہ سابق صدر نکولس مادورو سے جیل میں ملاقات یا بات چیت میں دلچسپی نہیں رکھتے۔
مشرق وسطیٰ اور خطے کے دیگر تنازعات کے حوالے سے صدر ٹرمپ نے روس، یوکرین جنگ ختم کرانے کی کوششوں کا ذکر کیا۔ وینزویلا کے بارے میں انہوں نے دعویٰ کیا کہ امریکہ نے وہاں سے 50 ملین بیرل تیل حاصل کیا اور کچھ تیل اوپن مارکیٹ میں فروخت بھی کیا جا رہا ہے۔
جنوبی ایشیا کے بارے میں صدر ٹرمپ نے پاک بھارت کشیدگی سے متعلق اپنا موقف دہرایا۔ انہوں نے کہا کہ دونوں جانب “آٹھ طیارے مار گرائے گئے” اور ان کے بقول حالات مزید بگڑتے تو بڑا جانی نقصان ہو سکتا تھا۔ یہ بات صدر ٹرمپ نے بطور دعویٰ صحافیوں کے سامنے کہی۔
