پروٹین شیک کا استعمال آج کل وزن کم کرنے اور جسمانی فٹنس بہتر بنانے کے لیے عام ہوتا جا رہا ہے، تاہم ماہرین صحت نے اس کے غیر ضروری اور بے قابو استعمال پر اہم انتباہ جاری کیا ہے۔
ماہرین کے مطابق پروٹین جسم کی نشوونما، مدافعتی نظام کی مضبوطی اور توانائی برقرار رکھنے کے لیے ضروری جز ہے، لیکن اس کی مقدار ہر فرد کی ضرورت کے مطابق ہونی چاہیے۔
عام طور پر ایک صحت مند بالغ فرد کو اپنے جسمانی وزن کے حساب سے روزانہ مناسب مقدار میں پروٹین درکار ہوتی ہے، جو متوازن غذا کے ذریعے بھی حاصل کی جا سکتی ہے۔
ماہرین کا کہنا ہے کہ جو افراد باقاعدگی سے ورزش نہیں کرتے، ان کے لیے اضافی پروٹین شیکس کا استعمال فائدے کے بجائے نقصان کا باعث بن سکتا ہے، کیونکہ اس سے اضافی کیلوریز جسم میں جمع ہو کر وزن بڑھا سکتی ہیں۔
اس کے علاوہ بعض پروٹین شیکس میں شامل چینی اور دیگر اضافی اجزاء بھی صحت پر منفی اثر ڈال سکتے ہیں۔
صحت کے ماہرین نے زور دیا ہے کہ قدرتی غذائیں نہ صرف پروٹین بلکہ وٹامنز، منرلز اور فائبر بھی فراہم کرتی ہیں، اس لیے مصنوعی سپلیمنٹس کے بجائے متوازن غذا کو ترجیح دینا بہتر ہے۔
گردوں کے مریضوں کو خاص طور پر مشورہ دیا گیا ہے کہ وہ پروٹین شیک استعمال کرنے سے پہلے ڈاکٹر سے ضرور مشورہ کریں۔
