پاکستان کرکٹ ٹیم کے سابق کپتان یونس خان کو قومی ٹیسٹ ٹیم کا نیا ہیڈ کوچ مقرر کیے جانے کا امکان ظاہر کیا جا رہا ہے، جبکہ موجودہ ہیڈ کوچ سرفراز احمد کے عہدے میں تبدیلی متوقع ہے۔
میڈیا رپورٹس کے مطابق رواں سال اپریل میں ٹیسٹ ٹیم کی کوچنگ سنبھالنے والے سرفراز احمد کی کارکردگی سے متعلق پاکستان کرکٹ بورڈ میں غور جاری ہے۔ ذرائع کا کہنا ہے کہ بنگلادیش کے خلاف حالیہ سیریز میں شکست کے بعد ٹیم مینجمنٹ میں تبدیلیوں پر سنجیدگی سے سوچا جا رہا ہے۔
پاکستان ٹیم نے بنگلادیش کے خلاف دو ٹیسٹ میچوں کی سیریز میں 2-0 سے شکست کھائی تھی، جبکہ ہوم گراؤنڈ پر بھی قومی ٹیم کو ناکامی کا سامنا کرنا پڑا۔
ذرائع کے مطابق سابق کپتان یونس خان اس وقت ٹیسٹ ٹیم کی کوچنگ کے لیے مضبوط امیدوار سمجھے جا رہے ہیں، جبکہ امکان ہے کہ سرفراز احمد کو پاکستان شاہینز کے ساتھ ذمہ داریاں جاری رکھنے کا موقع دیا جائے۔
دوسری جانب پاکستان کرکٹ بورڈ کی جانب سے ابھی تک کسی بھی تبدیلی یا نئے تقرر کی باضابطہ تصدیق سامنے نہیں آئی۔
یاد رہے کہ سابق اوپنر احمد شہزاد نے بھی سرفراز احمد کی بطور ہیڈ کوچ تقرری پر سوال اٹھاتے ہوئے کہا تھا کہ انہیں بغیر خاطر خواہ کوچنگ تجربے کے اہم ذمہ داری سونپی گئی۔
