گرمیوں کے آغاز کے ساتھ ہی پھلوں کے بادشاہ آم کی مانگ میں اضافہ ہو جاتا ہے اور لوگ اسے شوق سے خرید کر استعمال کرتے ہیں، تاہم ماہرین نے خبردار کیا ہے کہ غیر قدرتی طریقے سے پکائے گئے آم صحت کے لیے سنگین خطرات پیدا کر سکتے ہیں۔
ماہرین کے مطابق مارکیٹ میں بعض آم ایسے بھی دستیاب ہوتے ہیں جنہیں قدرتی طور پر پکانے کے بجائے کیمیکل کاربائیڈ کے ذریعے جلدی پکایا جاتا ہے، جو انسانی صحت کے لیے انتہائی نقصان دہ ہے۔
ماہرین کا کہنا ہے کہ کاربائیڈ کے استعمال سے ایسے مرکبات پیدا ہو سکتے ہیں جو جسم میں داخل ہو کر نظامِ ہاضمہ، سانس اور اعصابی نظام کو متاثر کر سکتے ہیں۔ اس کے نتیجے میں پیٹ کے امراض، سردرد، سانس لینے میں دشواری اور طویل المدتی صحت کے مسائل پیدا ہونے کا خدشہ رہتا ہے۔
فوڈ سیفٹی حکام نے شہریوں کو ہدایت کی ہے کہ آم خریدتے وقت ان کی ظاہری حالت پر خاص توجہ دیں۔ اگر آم غیر معمولی طور پر چمکدار ہوں، بہت زیادہ تیز رنگ کے ہوں یا ان سے کیمیکل جیسی بو آئے تو ایسے پھل سے اجتناب کیا جائے۔
ماہرین کے مطابق قدرتی طور پر پکے ہوئے آم نرم، خوشبودار اور یکساں رنگ کے ہوتے ہیں، اس لیے خریداری کے وقت ان علامات کو ضرور مدنظر رکھنا چاہیے تاکہ صحت کے خطرات سے بچا جا سکے۔
