کراچی میں دہشتگرد حملے میں شہید ہونے والے پاکستان رینجرز (سندھ) کے اہلکاروں کی نماز جنازہ ادا کر دی گئی، جس میں اعلیٰ سول و عسکری حکام، شہداء کے اہل خانہ اور دیگر معززین نے شرکت کی۔
حکام کے مطابق دہشتگرد حملے کو ناکام بنانے کی کارروائی کے دوران رینجرز کے جوان شہید ہوئے۔ نماز جنازہ میں وفاقی وزیر داخلہ، گورنر سندھ، وزیر اعلیٰ سندھ، ڈی جی رینجرز، شہداء کے لواحقین اور سینئر سول و عسکری حکام نے شرکت کی اور شہداء کی قربانیوں کو خراجِ عقیدت پیش کیا۔
اس موقع پر وفاقی وزیر داخلہ محسن نقوی نے کہا کہ دہشتگردی کا یہ واقعہ انتہائی افسوسناک ہے اور اس میں ملوث عناصر کو قانون کے کٹہرے میں لایا جائے گا۔ انہوں نے کہا کہ سکیورٹی فورسز دہشتگردوں کا ہر جگہ تعاقب کر کے انہیں انجام تک پہنچائیں گی۔
گورنر سندھ نہال ہاشمی نے دہشتگردی کی مذمت کرتے ہوئے کہا کہ ملک سے دہشتگردی کے مکمل خاتمے کے لیے کوششیں جاری رہیں گی اور کسی بھی قسم کی دہشتگردی برداشت نہیں کی جائے گی۔
وزیراعلیٰ سندھ مراد علی شاہ نے کہا کہ رینجرز کے بہادر جوانوں نے دہشتگردوں کے ناپاک عزائم ناکام بناتے ہوئے عظیم قربانی دی ہے۔ انہوں نے یقین دلایا کہ دہشتگردی کے خاتمے کے لیے حکومت سکیورٹی فورسز کے ساتھ کھڑی ہے۔
نماز جنازہ کے بعد شہداء کے جسد خاکی ان کے آبائی علاقوں کو روانہ کر دیے گئے، جہاں انہیں مکمل فوجی اعزاز کے ساتھ سپردِ خاک کیا جائے گا۔
بعد ازاں وفاقی وزیر داخلہ محسن نقوی نے گورنر سندھ کے ہمراہ دہشتگرد حملے کی جائے وقوعہ کا بھی دورہ کیا۔
